美職今輪重頭戲必定係洛杉磯銀河主場對新英倫革命，銀河星味十足踢法有前冇後，極富娛樂性，主場出擊更加唔會欺場。至於革命身為榜首勁旅，攻力亦唔小，兩「大」勢力今次短兵相接，唔需要費神估勝負，一於直取入球大。（now 633周六早上10時30分直播）
銀河上仗作客華盛頓聯隊，遭遇滑鐵盧，以一比四慘敗而回，雖然球隊輸波，不過仍然貫徹大開大合風格。事實上，銀河今季成績雖比上季有改善，不過仍然唔稱得上穩健，佢最穩定水準反而係入波方面，踢十四場聯賽，已攻入三十四球，結果有十二場開入球大，開大比率高達八成六，因此身邊唔少朋友都話，見到有銀河比賽，唔使諗就買大，絕對唔誇張。
銀河進攻多元化
而且銀河入波球員已經唔再只係集中於當路雲同碧咸身上，前鋒艾臣布度狀態持續大勇，近七場聯賽六場有波入，當中有兩場更係大演帽子戲法，加上另一位前鋒阿倫哥頓同中場基斯基連亦偶有佳作，令球隊進攻更多元化。銀河今場要贏波未必得，但要入波就唔成問題。
至於新英倫革命坐得上聯賽總排名第一，實力當然有番咁上下，呢支上季總亞軍今季捲土重來，士氣更加旺盛，已佔據榜首位置多時。雖然革命入波數字唔及對手，但要攻破銀河豆腐渣防線，仍然綽綽有餘，問題係可唔可以阻止對方入波。兩軍特性都有利製造入波，捧入球大最簡單直接。
另外，比賽當日係美國國慶，節日氣氛濃厚，或會進一步刺激雙方入波意欲，以一場入球騷賀國慶。
